متابعة / نجوى راغب
بقلم / هيام عبدالمنعم نصر
البطاطس نعمل منها كذا حاجة
1- صنية حلقات البطاطس
بقطع البطاطس حلقات بالقطاعة عشان تبقي شكلها مشرشر بس اهم حاجة حجم البطاطس تكون صغيرة
بعد كدا بقطع بصل حلقات وطماطم وفلفل
بجيب ربع كيلو لحمة مفرومة وأبشرة عليه بصلتين وملح وفلفل واهرسها بايدى واعملها كور صغيرة وابططها
اعمل حلقة بطاطس بصل لحمة مفرومة وهكذا
وتاني صف بطاطس فلفل لحمة
وتالت صف بطاطس طماطم لحمة
بعد كدا بضرب يجي نص شفشق طماطم وعليه ملح وفلفل ومعلقتين زيت وانزل بيه علي البطاطس
ادخلها بقى الفرن وممكن اسويها علي البوتجاز وبعد كدا اولع الشوايه تاخد لون
2- محشى البطاطس
تقشري البطاطس وتقطعيها بالطول وتحفريها بمعلقه صغيره واللى يطلع خليه علشان تحطيه ف ارضية الصينيه
وتعصجى اللحمه بقي ف حله تحطي معلقتين سمنه ومعلقة زيت (من الملاعق اللى بناكل بيها) وتحطي اللحمه لما السمنه تسخن وبعدين لما لونها يتغير تحطي بصل مفروم ناعم وتقلبي وتحطي البهارات ( ملح و فلفل اسود و حبهان خفيف وجوزة الطيب وبابريكا و رشة قرفه خفيفه ورشة سكر ) ولما تلاقيى مافيهاش ميه خالص ممكن تحطي عليها عصير طماطم او صلصه او تخليها كده من غير طماطم وتزوديها ميه وتوطي عليها النار وتخليها تستوى ومايبقاش فيها ميه
وبعدين تجيبي صنيه وتحطي اللى طلع من البطاطس ف الارضيه وتحشي البطاطس باللحمه العصاج وترصيها ف الصنيه وبعدين تجيبي كوباية ميه كبير وتحطي فيها معلقة صلصه ( اختياري) ومكعب مرقه او لو عندك شوبه اسقيها كوباية شوربه وتغطيها وتدخليها الفرن على حراره عاليه لحد ما تغلي وبعدين توطي النار لحد ما تستوى
ولما تستوى شيلي الغطا وافتحلها الشوايه علشان تاخد لون حلو
حمرى كمان ال طلع منها من التقوير وحطية تحت فى ارضية الصنية هايبقى روووعة
3- شبسى بالبيض
تقطعى بصلة حلوة كدة بالسكينة وشوحيها على النار واول ماتدخل على اللون الذهبى قطعى عليها فلفل الوان دقيقة كدة وشيليها من على النار وهاتى بقى بيض وحطى علية فلفل اسود وملح و روبية بالمعلقة وحطى علية شوية لبن صغيرة قوووى وهاتى كيس شيبسى وكسرية ( دوسى على كيس الشبسى هايتكسر معاكى ) وقلبية فى البيض ال علية شوية لبن صغيرة قوووى وحطى بقى عليهم البصل ال شوحتية بالفلفل الالوان واقلية بقى فى طاسة فيها سمن وادعيلى عشان العيال هايخلصوة قبل ماتحطى باقى الفطار
بس خدى بالك ماتكتريش الملح عشان الشيبسى فيه ملح
4- بطاطس مهروسة ( بطاطس بورية )
اسلقيها كويس بالملح والفلفل والكمون وبعد ماتشليها من عل النار في طبق مسطح اهرسيها وضيفي عليها حتة زبدة وتوم مفروم وفلفل اخضر مفروم
أو تضيفى عليها لبن وجبن كيرى وقشطة ال بتخرجيها من على وش اللبن وظبطيها وممكن مايونيز كمان حسب الطعم اللي بتحبيه ولو ماعندكيس قشطة ولا كيرى ممكن تهرسيها بالزبدة او بزيت الزيتون
5- كفتة بطاطس
اسلقى البطاطس واهرسيها وحطى عليها بيضة وشوية بقسماط وخدى حبة بططيهم كدة واحشيها لحمة مفرومة وجبن موتزريلا وكوريها واغمسيها فى بيض وفيجيتار وحمريها فى الزيت
6- عجة البطاطس
– تشوحى البصل فى زيت وعلية فلفل الوان ونبشر جزر ونبشر كوسة ونشوحهم برضة مع البصل وشوية ثوم
– بعدين تنزلى عليهم بطماطم متقطعة حتت صغيرة والملح والفلفل الاسود والبهارات ( خدى بالك مااكتريش الملح عشان الزيتون والجبن والبطاطس المسلوقة وكلة فية ملح )
– نضرب البيض وعلية فلفل اسود ونضيفة للدقيق وكيس بكنج بودر
– نسلق البطاطس او نبشرها بالمبشرة ونحط عليها شوية خضرة( بقدونس وكسبرة ) والبيض بالدقيق ونقلبهم كويس مع بعض
– نجيب صنية مدهونة زيت ونحط نص الكمية دى ( البطاطس المهروسة ال عليها البيض بالدقيق ) وبعدين نحط الخليط ال شوحناة مع البصل ( الجزر المبشور والكوسة المبشورة والبصل والطماطم المتقطعة والفلفل الالوان ) ونحط عليهم جبن موتزريلا وزيتون اسود مخلى ونحط النص الباقى من البطاطس المهروسة ونحط على وشها جبن موتزريلا تانى
خدى بالك إيدك تبقى مبلولة مية عشان تعرفى تفردى البطاطس المهروسة بسهولة وندخلها الفرن
ممكن تعمليها كور او قرص بنفس الحشوة وتقليها فى الزيت بس زودى مع الدقيق شوية نشا
7- صنية بطاطس بالطماطم نى فى نى
بتحطى طماطم معصورة ومعاها ثوم مدقوق وبصل متقطع حلقات وبطاطس حلقات وحتة سمنة وشوية مية ومرقة دجاج والملح وافلفل وبهاراتك
8- صنية بطاطس بالسجق
هاتجيبى طماطم تقطعيها مكعبات وفلفل رومى مكعبات برضة وبصل وملح وفلفل اسود وبهاراتك حطيهم مع بعض كده وادعكيهم كويس فى بعض وبعد كدة حطى البطاطس الى مقطعاها مكعبات والسجق تقطعية او تحطية سليم براحتك وماتحطيش مية عشان الطماطم والبصل هاتنزل ميتها ولا تحطى سمنة عشان السجق هاينزل دهون وحطيها على النار ربع ساعة وهاتستوى وتبقى زى الفل
9- تحمريها وتعملى جنبها مكرونة
10- مدفونة بطاطس
11- طاجن البطاطس المهروسة (البيورية) بالفراخ
12- ممكن كمان تعملى البطاطس المهروسة بانية
13- ممكن كمان تعملى البطاطس المهروسة بالباشميل
14- ممكن كمان تعملى كرات البطاطس بالجبنة الموتزريلا
15- ممكن كمان تعمليها بالبيض فى السمنة
بتهرسى البطاطس عادى وتهرسيها
تقلى بيض فى السمنة وتقلبى معاها البطاطس دقيقتين كدة تقريبا
